Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполняя́й, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша. (1)

Святы́й Бо́же, Святы́й Кре́пкий, Святы́й Безсме́ртный, поми́луй нас. (Читается трижды, с крестным знамением и поясным поклоном.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды)

Сла́ва, и ны́не:

О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Господи, помилуй (12 раз)

Слава, и ныне.

Приидите, поклонимся Цареви нашему Богу. (Поклон)

Приидите, поклонимся и припадем Цареви нашему Богу. (Поклон)

Приидите, поклонимся и припадем Самому Христу, Цареви и Богу нашему. (Поклон)

ТРОПАРЬ СВТ. ЛУКЕ КРЫМСКОМУ, глас 1:

Возвестителю пути спасительного, /

исповедниче и архипастырю Крымския земли, /

истинный хранителю отеческих преданий, /

столпе непоколебимый, православия наставниче, /

врачу богомудрый святителю Луко, /

Христа Спаса непрестанно моли, /

веру непоколебиму православным даровати //

и спасение, и велию милость.

Слава:

ТРОПАРЬ ПРИМЦ.ЕЛИСАВЕТЕ, глас 1:

Смирением достоинство княжеское сокрывши, /

богомудрая Елисавето, /

сугубым служением Марфы и Марии /

Христа почтила еси. /

Милосердием, терпением и любовию себе предочистивши, /

яко жертва праведная Богу принеслася еси. /

Мы же, чтуще добродетельное житие и страдания твоя, /

яко истинную наставницу усердно просим тя: /

святая мученице великая княгине Елисавето, //

моли Христа Бога спасти и просветити души наша.

И ныне:

КОНДАК СВТ. ЛУКЕ КРЫМСКОМУ, глас 1:

Якоже звезда всесветлая, добродетельми сияющи, /

был еси святителю, /

душу же равноангельну сотворил, /

сего ради святительства саном почется, /

во изгнании же от безбожных много пострадал /

и непоколебим верою пребыв, /

врачебною мудростию многия исцелил еси. /

Темже ныне честное тело твое от земленных недр обретенное дивно Господь прослави, /

да вси вернии вопием ти: /

радуйся, отче святителю Луко, //

земли Крымстей похвало и утверждение.

Песнь 1.

Ирмос: Дивному Богу величия принесем, и великолепно с нами да воспоёт земля и небо ясно славу Его.

Припев: Милостиве Господи, услыши молитву раб Своих, молящихся Тебе.

В день печали, нашедшия на ны, к Тебе, Христе Спасе, припадающе, Твоея милости просим. Облегчи болезни раб Твоих, изреки нам яко и сотнику: иди, се здрав есть отрок твой.

Припев: Милостиве Господи, услыши молитву раб Твоих, молящихся Тебе.

Мольбы и моления, с воздыханием к Тебе вопием, Сыне Божий, помилуй нас. Воздвигни со одра лежащих, яко разслабленнаго словом: возьми одр твой, глаголя, отпущаются ти греси твои.

Припев: Святителю отче Луко, моли Бога о нас.

Святительский престол во граде Симферополе украсил светло, в нем пожив, яко Ангел, святым житием и учением Божественным освятил еси люди, да вси приносят величия Божия и поют славу Его.

Припев: Святителю отче Луко, моли Бога о нас.

Вседержителя и Господа о нас моли, святителю Луко, даровати нам оставление прегрешений, да с тобою дивному Богу величия принисем, и воспоём славу Его.

Припев: Пресвятая Богородице, спаси нас.

Тя призывающим спасительное еси пристанище и покров, Богородительнице Пречистая, темже от души призываем Тя тепле: Владычице, спаси ны и научи нас дивному Богу величия приносити и воспевати славу Его.

Песнь 3.

Ирмос: Уподоби мя, Христе, умно горе Сионстей, возвысивый и утвердивый в надежди о Тебе и искапавый рос благодати, Человеколюбче.

Припев: Милостиве Господи, услыши молитву раб Твоих, молящихся Тебе.

Иже от тяжких болезней на земли повержены, к Тебе, Христе, с нами вопиют, подаждь здравие телесем их, яко же Иезекии плакавшуся к Тебе.

Припев: Милостиве Господи, услыши молитву раб Твоих, молящихся Тебе.

Призри, Господи, на наше смирение, и не помяни беззаконий наших, но веры ради болящих, яко прокаженнаго словом исцели им болезнь, да Твое, Христе Боже, славится имя.

Припев: Святителю отче Луко, моли Бога о нас.

Источил еси, святителю, учения реки благодатныя и всяку душу благочестивых напоил еси, многия исцелил еси и о всех усерднее молился, да искапает росу благодати Своея Человеколюбец.

Припев: Святителю отче Луко, моли Бога о нас.

Труды твоими, яко добрый пастырь, святителю Луко, указал еси людем путь в Царство Небесное и за подвиги твоя от Бога венчан славою на небеси, Егоже моли, да ниспослет и нам росу благодати Своея, Человеколюбец.

Припев: Пресвятая Богородице, спаси нас.

Любити убо Тя, Пречистая Богомати, и песнию прославляти Тебе научает нас великий Архангел и звати, Богоневесто, ежи радуйся, яко Господь с Тобою: радуйся, Радосте Ангелов и всех человеков.

Седален, глас 8:

Ко Господу имея очи сердечныя, святитель явился еси Богоподобен и Крымскую паству преславно упасл еси, отгоняя полки безбожных палицею словес Божественных, темже по кончине благодать достойно наследовал еси, святителю блаженне. Сего ради вопием ти: моли Христа Бога грехов оставление даровати чтущим всечестную память Твою.

Слава и ныне,

Припев: Пресвятая Богородице, спаси нас.

Тя пристанище, и стену, и прибежище, и надежду, и покров, и заступление теплое обретши вернии, к Тебе притекаем и вопием прилежно, и зовем верно: помилуй, Богородице, уповающих на Тя и от прегрешений избави.

Песнь 4.

Ирмос: Всел еси на кони, апостоли Твоя, Господи, и приял еси руками Твоима узды их, и спасение бысть еждение Твое верно поющим: слава силе Твоей, Господи.

Припев: Милостиве Господи, услыши молитву раб Твоих, молящихся Тебе.

Уже отчаянна лютым недугом и к смерти приближившася, возврати, Христе, на живот и даждь плачущимся утеху, да вси прославляем Твоя святая чудеса.

Припев: Милостиве Господи, услыши молитву раб Твоих, молящихся Тебе.

К Тебе, Творче, каемся в своих гресех, яко не хощеши смерти грешничи, оживи, уздрави болящих, да востав послужат Ти, исповедуя с нами Твою благость.

Припев: Святителю отче Луко, моли Бога о нас.

Юже стяжал еси честною Твоею Кровию, Церкве Твоея, Христе, чада утверди и направи на путь мира, тако воздыхал еси к Сыну Божию, святителю отче наш Луко, преподобныя своя руце о пастве воздеюща.

Припев: Святителю отче Луко, моли Бога о нас.

Любы николиже отпадает, глаголет Божественный Дух устами апостола Павла. В твоих деннонощных трудах исцелений недужных, любовь твоя известися, угодниче Христов, и сию проявил еси в милосердии, непрестанно вдов питая и сирых, и немощных.

Припев: Пресвятая Богородице, спаси нас.

Крепость наша Ты еси, Пречистая Богомати, Твоими бо мольбами и святителя Луки, избавихомся вси от страстей, и бед, и обстояний, и недугов многообразных, Спасу Христу зовущее: слава силе Твоей, Господи.

Песнь 5.

Ирмос: Повеления Твоя прсвещением, Христе Боже, яко Благ, показал еси, зане,Светодавче, от нощи утренююще, славу возсылаем.

Припев: Милостиве Господи, услыши молитву раб Твоих, молящихся Тебе.

Дщерь Иаирову уже умершу, яко Бог оживил еси, и ныне возведи, Христе Боже, от врат смертных болящаго, Ты бо еси Путь и Живот всем.

Припев: Милостиве Господи, услыши молитву раб Твоих, молящихся Тебе.

Сына вдовича оживив Спасе, и тоя слезы преложив на радость, спаси от недуга тлеющаго раба Твоего, да и наша скорбь и болезнь на радость приидет.

Припев: Святителю отче Луко, моли Бога о нас.

Единицу несозданную богословил еси Троицу Святую Бога нашего и человеческаго естества состав о духе, душе и теле священными богословии твоими научил еси.

Припев: Святителю отче Луко, моли Бога о нас.

Умом чистым и писании духовными назидал еси, Богоглаголиве Луко, образ был еси всей богоданной пастве твоей, словом и житием, любовию, верою и чистотою.

Припев: Пресвятая Богородице, спаси нас.

Едина Чистая, Богородительнице, не презри молений раб Твоих, прими сия молитвы ради угодника Твоего святителя Луки, и принеси ко престолу сына Твоего, да спасет души наша.

Песнь 6.

Ирмос: Отвергл мя еси во глубины сердца морскаго, и видех чудеса Твоя, Господи.

Припев: Милостиве Господи, услыши молитву раб Твоих, молящихся Тебе.

Бездну милосердия и милости имея, Христе Боже, услыши моления раб Твоих. Ты бо еси Петром Тавифу воскресил, Ты и ныне в болезни лежащаго воздвигни, послушав церковных молитвенник.

Припев: Милостиве Господи, услыши молитву раб Твоих, молящихся Тебе.

Врачу душам и телесем нашим, понесый недуги всего мира, Христе, и Енея Петром исцеливый, Ты и ныне болящаго исцели святых апостол молитвами.

Припев: Святителю отче Луко, моли Бога о нас.

Ризную худость имел еси, пребогате, вся бо своя неимущим раздавал, сироты и вдовыя питая, рачитель же сый Милостиваго Спасителя Христа быв.

Припев: Святителю отче Луко, моли Бога о нас.

Духовныя жизни всем людем страны нашея учитель был, благочестием украшаяся, гордыню посекл еси, блаженнее, духовным мечем, пастыри назирая и утверждая.

Припев: Пресвятая Богородице, спаси нас.

Отроковице Богоизбранная, восхваляем Тя вси и верно молимся, Дево Марие: моление наше прими и прошения исполни

Кондак, глас 3-й:

Душу мою, Господи, во гресех всяческих,/ безместными деяньми разслаблену/ воздвигни божественным Твоим человеколюбием,/ яко же и разслабленнаго воздвигл еси древле,/ да зову Ти спасаем: щедре Христе, даждь ми исцеление.

Икос

Исповедании священными подобствовав, сеятель был еси духовных добродетелей, нечестия же явился искоренителю, святителю Луко прехвальне, яко архипастырь и учитель жизнь совершив, к Небеси востекл еси и венец неувядаемый от Господа приял. Сего ради вопием ти: Радуйся, отче святителю Луко, земли Крымстей похвало и утверждение.

Песнь 7.

Ирмос: В начале землю основанный и Небеса словом утвердивый, благословен еси во веки, Господи, Боже отец наших.

Припев: Милостиве Господи, услыши молитву раб Твоих, молящихся Тебе.

О, Кресте Пресвятый Христов, честное Древо Животное. Тобою смерть погибе и мертвии воскресоша, и ныне болящаго исцели и оживи, якоже при Елене умершу девицу.

Припев: Милостиве Господи, услыши молитву раб Твоих, молящихся Тебе.

Долгую и лютую болезнь Иовлю на гноищи и в червех, того молящася, словом исцелил еси, Господи. И ныне же в церкви о болящем молим Тя: яко благ, исцели невидимо молитвами святых Твоих.

Припев: Святителю отче Луко, моли Бога о нас.

Елеем любве твоея помазал еси люди, иго Христово на рамо взем, последовал еси стопам Его, Святительски потрудился, слово Божие возвестил да прославляют верныя чада Сотворшаго вся, поя Господеви: благословен еси во веки Боже отец наших.

Припев: Святителю отче Луко, моли Бога о нас.

Пастырь добрый словесному стаду твоему, святителю Луко, был еси, душу твою за овцы положити готовый: темже и явился еси обидимый заступник непреоборимый, правды же ревнитель неустрашимый, сильных мира сего с любовию обличая и пасомых своих отечески вразумляя и наставляя, да верно воспевают Господа, Бога отец наших.

Припев: Пресвятая Богородице, спаси нас.

Радости Подательнице, Богородительнице Пречистая, верою славящия от души поющия Тя, радости неизреченныя исполни и Света Невечерняго сподоби, Дево Богоблагодатная, Владычице.

Песнь 8.

Ирмос: Покрываяй водами превыспрення Своя, полагаяй морю преелпесок и содержай вся, Тя поет солнце, Тя хвалит луна, Тебе приносит песнь вся тварь, яко Содетелю всех во веки.

Припев: Милостиве Господи, услыши молитву раб Твоих, молящихся Тебе.

Милость покажи, Владыко, в болезни раб Твоих, и скоро исцели, милостиве Христе Боже, и аще смерти не предаждь судней, да Ти покаяние воздадут. Сам бо рекл еси: не хощу смерти грешничи.

Припев: Милостиве Господи, услыши молитву раб Твоих, молящихся Тебе.

Господи милостиве, Твоя преславная чудеса да и до нас ныне достигнут: бесы прожени, недуги погуби, раны исцели, болезни уврачуй, и потворы и чародеяния и всякия язи избави ны.

Припев: Святителю отче Луко, моли Бога о нас.

Имя твое, святителю Луко, якоже благоухание рая Божия по лицу всея земли нашея обносится, услаждая сердца верующих и призывая в радости духовней воспевати Содетеля всех во веки.

Припев: Святителю отче Луко, моли Бога о нас.

Ныне ни в зерцалех, ни в гаданиих добрых, лицем же к лицу Христа Господа зриши, вопия радостно тя Прославльшему Содетелю всех во веки.

Припев: Пресвятая Богородице, спаси нас.

Шедшее путем Божественных заповедей Сына Твоего, Богомати, и Тя Заступницу и Предстательницу имея, весь род человеческий Твоим Рождеством от праотча падения восстает и от клятвы праматерния избавляется.

Песнь 9.

Ирмос: Благословен Господь, Бог Израилев, воздвигнувый рог спасения нам в дому Давидове, отрока Своего, в них же посети нас Восток с высоты и направил ны есть на путь мира.

Припев: Милостиве Господи, услыши молитву раб Твоих, молящихся Тебе.

Источниче жизни, подателю, Христе, милости, не отврати лица Твоего от нас. Облегчи болезнь утружденным болезнию, и воздвигни яко Фаддеом Авгаря, да присно Тебе славят со Отцем и Святым Духом.

Припев: Милостиве Господи, услыши молитву раб Твоих, молящихся Тебе.

Евангельскому верующе гласу, Твоего ищем обета, Христе: просите бо, рече, и дастся вам. Тем и ныне предстояще молим Тя, возстави со одра здрава лютым повержена недугом, да Тя с нами вкупе величает.

Припев: Святителю отче Луко, моли Бога о нас.

Евангелие Христово проповедав, мудре Святителю, дело Божие на земли совершив и сподобившись приятия Святых Таин Христовых, о Бозе почил еси.

Припев: Святителю отче Луко, моли Бога о нас.

Ныне с Вышними Воинствы моли, угодниче Христов, Человекобца даровати притекающим к предстательству твоему оставление грехов и жития исправление.

Припев: Пресвятая Богородице, спаси нас.

Ежи радуйся, со Архангелом зовем Ти, Чистая, яко Царя Небеснаго родила еси, Дево Богородице, и молим Тя: избави ны, рабы Твоя вечныя смерти.

Светилен:

Святитель и исповедник явился еси, Луко преславне, страстей Христовых раны нося. Плотию, аще и почил еси, но духом жив сый, в Царствии невечернем со Христом царствуеши и присно молишися Ему со верою и любовию тя величающих.

Слава и ныне,

Припев: Пресвятая Богородице, спаси нас.

Вышних чиноначалий Превышая сущи, нас нижних, не отступай, но присно с нами буди, свобождающи от всяких наветов, Твою бо, Владычица, крепкую о нас помощь видяще, никтоже восстанет на ны.

Молитва за болящих.

Боже сильный, милостию строяй вся на спасение роду человеческому, посети раб Твоих (имена), нарицающих имя Христа Твоего, исцели их от всякого недуга плотскаго: и отпусти грех и греховныя соблазны, и всяку напасть, и всяко нашествие неприязнено далече сотвори от раб Твоих. И воздвигни от одра греховнаго, и устрой их во святую Твою Церковь здравых душею и телом, и делы добрыми славящих со всеми людьми имя Христа Твоего, яко Тебе славу возсылаем, со Безначальным Ти Сыном и со Святым Духом, ныне и присно и во веки веков. Аминь.

Молитва святителю Луке, исповеднику, архиепископу Крымскому.

О всеблаженный исповедниче, святителю отче наш Луко, великий угодниче Христов! Со умилением приклоньше колена сердец наших, и припадая к раце честных и многоцелебных мощей твоих, якоже чада отца молим тя всеусердно: услыши нас грешных и принеси молитву нашу к милостивому и человеколюбцу Богу, Емуже ты ныне в радости святых и с лики ангел предстоиши. Веруем бо, яко ты любиши ны тою же любовию еюже вся ближния возлюбил еси, пребывая на земли.

Испроси у Христа Бога нашего да утвердит во святей своей Православней Церкви дух правыя веры и благочестия: пастырям ея да даст святую ревность и попечение о спасении вверенных им людей: право верующия соблюдати, слабыя и немощныя в вере укрепляти, неведущия наставляти, противныя обличати. Всем нам подай дар коемуждо благопотребен, и вся яже к жизни временней и к вечному спасению полезная. Градов наших утверждение, земли плодоносие, от глада и пагубы избавление. Скорбящим утешение, недугующим исцеление, заблудшим на путь истины возвращение, родителем благословение, чадом в страсе Господнем воспитание и научение, сирым и убогим помощь и заступление.

Подаждь нам всем твое архипастырское и святое благословение, да тобою осеняеми избавимся от козней лукаваго и избегнем всякия вражды и нестроений, ересей и расколов.

Даруй нам богоугодно прейти поприще временной жизни, настави нас на путь ведущий в селения праведных, избави нас воздушных мытарств и моли о нас всесильнаго Бога, да в вечней жизни с тобою непрестанно славим Отца и Сына и Святаго Духа, Емуже подобает всякая слава, честь и держава во веки веков. Аминь.

Молитва ухаживающих за болящими с любовью

Господи, Иисусе Христе, Сыне Бога Живаго, Агнче Божий, вземляй грехи мира, Пастырю добрый, положивый душу Твою за овцы Твоя, Небесный Врачу душ и телес наших, исцеляяй всякий недуг и всякую язву в людех Твоих! Тебе припадаем, помози нам, недостойной рабам Твоим (имена). Призри, Многомилостиве, на делание и служение наше, даждь нам быти верными в мале; послужити болящим, Тебе ради, носити немощи немощных, и не себе, но Тебе Единому угождати во вся дни живота нашего. Ты бо рекл еси, о, Сладчайший Иисусе: «Понеже сотвористе единому от сих братий Моих меньших, Мне сотвористе». Ей, Господи, суди нам, грешным, по сему глаголу Твоему, яко да сподобимся творити благую Твою волю во отраду и утешение искушаемых, недугующих раб Твоих, ихже искупил еси честною Твоею Кровию. Ниспосли нам благодать Твою, попаляющую в нас страстей терние, призвавый нас, грешных, на дело служения о Имени Твоем; без Тебе не можем творити ничесоже: посети убо нощию и искуси сердца наша, внегда предстояти нам у возглавия болящих и низверженных; уязви души наша Твоею любовию, вся терпящею и николиже отпадающею. Тогда возможем, Тобою укрепляеми, подвигом добрым подвизатися и веру соблюсти, даже до последнего нашего издыхания. Ты бо еси Источник исцелений душевных же и телесных, Христе Боже наш, и Тебе, яко Спасителю человеков и Жениху душ, грядущему в полунощи, славу и благодарение и поклонение возсылаем, ныне и присно и во веки веков. Аминь.

ВЕЛИЧАНИЕ:

Величаем тя, / исповедниче Христов святителю отче наш Луко, / и чтим святую память твою, / ты бо молиши за нас // Христа Бога нашего.

Величаем вас, / преподобномученицы Елисавето и Варваро, / и чтим честная страдания ваша, / яже за Христа / претерпели есте.

Окончание молитв

Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.(2)

Слава, и ныне: Господи, помилуй. (Трижды)

Господи, Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых помилуй нас. Аминь.

Примечания.

(1) От Пасхи до Вознесения вместо этой молитвы читается тропарь: «Христос воскресе из мертвых, смертию смерть поправ, и сущим во гробех живот даровав». (Трижды)

От Вознесения до Троицы начинаем молитвы со «Святый Боже…», опуская все предшествующие.

(2) От Пасхи до Вознесения вместо этой молитвы читается припев и ирмос 9-й песни пасхального канона: «Ангел вопияше Благодатней: Чистая Дево, радуйся! И паки реку: радуйся! Твой Сын воскресе тридневен от гроба и мертвыя воздвигнувый; людие, веселитеся! Светися, светися, новый Иерусалиме, слава бо Господня на тебе возсия. Ликуй ныне и веселися, Сионе. Ты же, Чистая, красуйся, Богородице, о востании Рождества Твоего».